पाल्पा । निजी तथा आवासीय विद्यालय अर्गनाइजेशन (प्याब्सन) पाल्पाले पत्रकार माधव अर्याल लगायतलाई सम्मान गरेको छ । प्याब्सनको आठौ जिल्ला अधिवेशनका अवसरमा सञ्चारको क्षेत्रमा योगदानको कदर गर्दै पाल्पाली करुवा, दोसल्ला र सम्मानपत्रले सम्मान गरेको हो ।
प्याब्सनका केन्द्रीय अध्यक्ष टिकाराम पुरी, सहअध्यक्ष डिके ढुंगाना, प्याब्सन जिल्ला अध्यक्ष भरत प्रसाद न्यौपाने लगायतले सम्मान गरेका हुन् ।
सोही अवसरमा शिक्षा क्षेत्रबाट शिक्षासेवी तानसेन नगरपालिका–९, दमकडाका राधाकृष्ण शर्मा, स्वास्थ्यका क्षेत्रमा कोभिड–१९ का बेला सक्रिय भूमिका निर्वाह गर्ने सन्चो हेल्थ केयर प्रालिका संचालक डा. झपेन्द्र ढकाल, कोभिडका बेला निःस्वार्थ काम गर्ने व्यवसायी तथा पाल्पा उद्योग वाणिज्य संघका उपाध्यक्ष यादवसिंह कार्कीलाई पनि सम्मान गरिएको छ ।
लामो समय निजी क्षेँत्रकाे शिक्षाका साथै विद्यालयमा अध्यापन गरेर योगदान गर्नेहरुलाई पनि प्याब्सन पाल्पाले सम्मान गरेको सह–सचिव अशेष भट्टराईले जानकारी दिए । सोही अवसरमा केन्द्रीय अध्यक्ष पुरी, सह–अध्यक्ष ढुंगानाले प्याब्सन पाल्पाको नवनिर्मित भवनको उद्घाटनसमेत गरेका छन् ।
