काठमाडौं। निर्वाचन आयोगबाट राष्ट्रियसभा सदस्य निर्वाचनका लागि निर्वाचन कार्यक्रम स्वीकृत भएको छ। स्वीकृत निर्वाचन कार्यक्रमअनुसार आगामी पुस २० गते निर्वाचन अधिकृतको कार्यालयमा मतदाता नामावली प्रकाशित हुने र सोही दिन अन्तिम मतदाता नामावली प्रकाशन हुने निर्वाचन आयोगले जनाएको छ।
आयोगले एक विज्ञप्ति जारी गर्दै सो बारे जानकारी दिएको हो । विज्ञप्तिअनुसार पुस २३ गते उम्मेदवारको मनोनयन दर्ताको समय तोकिएको छ। मनोनयन दर्ताको समय बिहान १० बजेदेखि अपरान्ह ३ बजेसम्म रहनेछ। यस्तै पुष २४ गते उम्मेदवारको विरोधमा उजुरी दिने समय तोकिएको छ। पुस २८ गते उम्मेदवारलाई निर्वाचन चिन्ह उपलब्ध गराउने आयोगले जनाएको छ ।
माघ ११ गते बिहान ९ बजेदेखि अपरान्ह ३ बजेसम्म मतदान हुनेछ।
मतदान कार्यक्रम सम्पन्न भएपछि सोही दिनमै मतगणना हुने आयोगका सहायक प्रवक्ता सूर्य प्रसाद अर्याल द्वारा जारी विज्ञप्तिमा उल्लेख छ ।
