पाल्पामा ७८ जना संक्रमण मुक्त, २१ जनामा कोरोना पुष्टि

तानसेन । पाल्पामा पछिल्लो २४ घण्टामा ७८ जना कोरोनामुक्त भएका छन् ।

स्वास्थ्य कार्यालय पाल्पाले दिएको जानकारी ४६ पुरुष तथा ३२ जना महिलाले कोरोना जितेका हुन् ।

हालसम्म एक हजार ४९३ जनाले कोरोना जितेको स्वास्थ्य कार्यालयको तथ्यांक छ । यस्तै २४ घण्टामा थप २१ जनामा कोरोना पुष्टि भएको स्वास्थ्य कार्यालय पाल्पाका सूचना अधिकारी ओम प्रकाश पन्थीले जानकारी दिए ।

संक्रमण पुष्टि हुनेमा १० जना महिला तथा ११ जना पुरुष रहेका छन् । उनीहरु मध्य १७ जनाको पीसिआर विधिबाट परीक्षण गर्दा ३ जना तथा ९१ जनाको एन्टिजेन विधिबाट कोरोना परीक्षण गर्दा १८ जनामा संक्रमण पुष्टि भएको स्वास्थ्य कार्यालय पाल्पाले जनाएको छ ।

हाल जिल्लामा ५२२ जना कोरोनाका सक्रिय संक्रमित रहेका छन भने १० जना संक्रमितले ज्यान गुमाएका छन् ।