तानसेन । पाल्पामा पौडी खेल्ने क्रममा खोलामा डुबेर एक किशोरको ज्यान गएको छ।
पाल्पाको तिनाउ गाउँपालिका-३ तल्लो सिद्धबाबा स्थित तिनाउ खोलामा पौडी खेल्ने क्रममा रुपन्देही हिलपार्कका १७ वर्षीय राजिव लामाको ज्यान गएको पाल्पा प्रहरीले जनाएको छ।
चार जना साथीहरु मिलेर खोलामा पौडी खेल्न गएकामध्ये राजिवको मृत्यु भएको जिल्ला प्रहरी कार्यालय पाल्पाका सूचना अधिकारी सुगन्ध श्रेष्ठले जानकारी दिए। उनका अनुसार पौडी खेलीरहेका चार जना मध्ये राजिव बेपत्ता भएका थिए।
खोलामा बेपत्ता भएसँगै प्रहरीलाई खबर गरिएको थियो। झन्डै तीन घण्टा खोजी कार्य गर्दा उनको शव फेला परेको प्रहरीको भनाई छ। अन्य तीन जनालाई सकुशल उद्दार गरी घटनाबारे थप अनुसन्धान जारी रहेकोे प्रहरीको भनाइ छ।
