पाल्पा। पूर्वी पाल्पाको निस्दी गाउँपालिका वडा नं.४ चिउँरीबासस्थित रामपुर अरुणखोला भित्री सडक खण्डमा शुक्रबार बिहान भएको जिप दुर्घटनाका मृतकमध्ये दुई जनाको पहिचान खुलेको छ । दुर्घटनामा परी मृत्यु हुने तीनमध्ये दुई जनाको पहिचान खुलेको हो।
मृत्यु हुनेमा निस्दी गाउँपालिका– ७ हुवासकी ३६ वर्षीया हेम कुमारी सारु, सोही गाउँपालिकाको ठोक्सिङ्गिबासकी ४५ वर्षीया ओम कुमारी खाँम्चा रहेको प्रहरीले जनाएको छ ।
जिल्ला प्रहरी कार्यालय पाल्पाका सूचना अधिकारी होम प्रकाश चौधरीका अनुसार अर्की मृतक महिलाको अहिलेसम्म पहिचान खुल्न सकेको छैन् । दुर्घटनामा परी आठ जना यात्रुहरु घाइते भएका छन् । घाइते मध्ये ४ जनाको मध्यविन्दु प्रादेशिक अस्पताल डण्डा र ४ जनाको चितवन मेडिकल कलेजमा उपचार भइरहेको प्रहरीले जनाएको छ। घाइतेमध्ये एक जनाको अवस्था गम्भीर रहेको र केही घाइतेहरु सामान्य उपचारपछि घर फर्किएका छन् ।
पूवी नवलपरासीको अरुणखोलाबाट पाल्पाको रामपुरतर्फ आइरहेको लु १ ज ३९०८ नम्बरको यात्रुवाहुक जिप दुर्घटना भएको थियो । चिउरीबासमा उकालोमा यात्रु ओराल्दै गर्दा रोकि राखेको फोर्स जिप आफै व्याक भएर दुर्घटना भएको प्रहरीले जनाएको छ । जिप सडकबाट करिब ११ सय मिटर तल खसेको थियो ।
जिपका चालकलाई प्रहरीले नियन्त्रणमा लिएर थप अनुसन्धान अगाडि बढाएको पाल्पा प्रहरीले जनाएको छ । जिप शुक्रबार बिहान करिब १० बजेतिर दुर्घटना भएकाे थियाे।
