पाल्पा। सिद्धार्थ राजमार्गको तानसेन–बुटवल सडकखण्ड पुनः अवरुद्ध भएको छ ।
गएराती तानसेन नगरपालिका ८ डुम्रेको गौडेपुल नजिकै माथिबाट ढुंगासहितको पहिरो खसेर राजमार्ग पुनः अवरुद्ध भएको हो ।
पहिरोमा फसेको लु १ क ११७५ नम्बरको ट्रक पन्छाउने क्रममा माथिबाट ठूलो पहिरो खसेर ट्रक समेत पुरिएको प्रहरी चौकी प्रभासका प्रमुख एक्का बहादुर नेपालीले जानकारी दिए।
ट्रक पुरै पुरिएको भएपनि चालक र सहचालक भने भाग्न सफल भएको हुँदा मानविय क्षती भने नभएको प्रहरीले जनाएको छ। पहिरो खस्ने क्रम नरोकिएका कारण पहिरो पन्छाउन समस्या भएको जिल्ला प्रहरी कार्यालयका सुचना अधिकारी मदन गिरीले बताए।
डिभिजन सडक पाल्पाको सहयोगमा पहिरो पन्छाउने प्रयास भइरहेको भएपनि पहिरो ठूलो भएको हुँदा पहिरो पन्छाउन दिनभरी नै लाग्ने प्रहरीले जनाएको छ ।
विगत एकसातादेखि नै सोही ठाउँमा पहिरोका कारण राजमार्ग पटक पटक अवरुद्ध हुँदै आएको छ ।निरन्तरको पहिरोका कारण सयौको संख्यामा रहेका यात्रुहरु बिच सडकमा अलपत्र परेका छन् ।
पहिरो सडकदेखि करिब १ सय मिटर माथिबाट निरन्तर खसिरहेको हुदाँ सडक सुचारु भएपछि पनि यात्रा गर्न जोखिम रहेको प्रहरीले जनाएको छ ।
