तानसेन । पाल्पामा पछिल्लो २४ घण्टामा कोरोना संक्रमण हुने र संक्रमणमुक्त हुनेको संख्या बराबर रहेको छ ।
स्वास्थ्य कार्यालय पाल्पाले दिएको जानकारी अनुसार २७ जनामा संक्रमण हुँदा २७ जना नै संक्रमणमुक्त भएका छन् । पछिल्लो २४ घण्टामा १८ जना महिला तथा ९ जना पुरुष कोरोनामुक्त भएको र स्वास्थ्य कार्यालयका सूचना अधिकारी ओमप्रकाश पन्थीले बताए ।
हालसम्म जिल्लामा संक्रमणमुक्त हुनेको संख्या ६ हजार ४४३ पुगेको स्वास्थ्य कार्यालयले जनाएको छ ।
यस्तै पछिल्लो २४ घण्टामा थप २७ जनामा संक्रमण पुष्टि भएको छ । पीसीआर विधिबाट गरिएको परीक्षणमा ५ र एन्टिजेन विधिबाट गरिएको परीक्षणमा २२ जना गरि २७ जना संक्रमण पुष्टि भएको स्वास्थ्य कार्यालय पाल्पाले जनाएको छ ।
पछिल्लो तथ्यांक अनुसार जिल्लामा संक्रमितको संख्या घट्दै गएको स्वास्थ्य कार्यालयले जनाएको छ । हाल जिल्लामा ३७२ जना सक्रिय संक्रमित रहेका छन भने हालसम्म १ सय ६ जना संक्रमितको मृत्यु भइसकेको छ ।
