सिद्धार्थ राजमार्ग पहिरोः पौठेडाडाँमा एकतर्फी खुल्यो, सेरामा अझै अवरुद्ध

तानसेन। वर्षासंगै पहिरो खसेपछि अवरुद्ध  सिद्धार्थ राजमार्गको तानसेन बुटवल सडक खण्ड एकतर्फी खुलेको छ । सडक भिडिजन कार्यालयको पहलमा पहिरो हटाएर एकतर्फी सवारी खुलेको हो ।

जिल्ला ट्राफिक प्रहरी कार्यालय पाल्पाका प्रमुख दामोदर मल्लका अनुसार ढुंगा पन्छाएर हालका लागि एकतर्फी सवारी पास गरिएको छ । यस्तै सोही राजमार्गको बर्तुङ्ग राम्दी सडक खण्ड अन्तरगत रम्भा ३ को सेरामा भने हालसम्म पनि सडक अवरुद्ध रहेको छ ।

लेदोसहितको पहिरोले सडक अवरुद्ध भएको र सडक सुलाउने प्रयास जारी रहेको प्रहरीले जनाएको छ । यस्तै सोही राजमार्गको तिनाउ ५ स्थित हिउँदे खोलामा पुनः सडक भासिएको छ । यसअघि पूर्ण रुपमा सडक भासिएर बनाइएको नयाँ डाइभर्सनन पनि केही भासिएको र निरन्तर पानी परेमा माथिबाट समेत पहिरो खस्ने जोखिम रहेको ट्राफिक प्रमुख मल्लले बताए ।