तानसेन। सत्ता गठबन्धनका जिल्ला संयोजक तथा नेपाली काँग्रेस पाल्पाका सभापति हिमालदत्त श्रेष्ठले दुई तिहाइ मत दिएर संसदमा पठाएको एमालेले राम्रोसँग संसद चलाउन नसकेर जनतालाई धोका दिएको बताएका छन् ।
दुई तिहाई मतसहित पाँच वर्ष संसद चलाउने जनमत पाएको एमालेले जनमत कुल्चिएर दुई/दुई पटक संसद भंग गरेकाले अहिलेको चुनावमा हामीलाई मत दिनुस् भन्नु नैतिकता नभएको र जनता झुक्काउने खेल मात्रै भएको बताए ।
पाल्पा क्षेत्र नं २ का विभिन्न क्षेत्रमा भएका चुनावी सभालाई सम्बोधन गर्दै सभापति श्रेष्ठले दुई /दुई पटक संसद भंग गर्ने, देशमा अस्थिरता फैलाउने, स्वच्छाचारिता गर्ने केपी ओली र उनको पार्टीले फेरी जनतालाई भुलभुलैयामा पार्नको लागि मत मागिरहेको बताए । उनले आफू दुई तिहाई मतसहित सत्तामा हूँदा राम्रोसँग सरकार चलाउन नसक्ने अनि फेरी कुन मुखले भोट देउ भनेका छन्, उनीहरुलाई सबै नागरिकले प्रश्न सोध्नुपर्ने र त्यसका विरुद्धमा गठबन्धनलाई विजयी गराउनुपर्ने श्रेष्ठको भनाई छ ।
एमालेको निरदलीय कदम र स्वेच्छाचारिता विरुद्धको गठबन्धन भएकाले एमालेका साथीहरुले समेत अहिले गठबन्धनलाई भोट दिएर विजयी बनाउनुपर्ने श्रेष्ठको तर्क छ । अब फेरी जनताले मत दिएर संसदमा गएपछि संसद विघटन गर्दैन भन्ने के ग्यारेन्टी त्यहि भएर ऐजेण्डा विहिन एमालेलाई भोट हालेर पछुताउनु मात्रै हुने श्रेष्ठको भनाई छ ।
देशमा परेको संवैधानिक र राजनीतिक संकटलाई समाधान गर्नको लागि अहिलेको पाँच दलीय गठबन्धन निर्माण भएको भन्दै नेता श्रेष्ठले अहिलेको गठबन्धनले जितेमा पाँचवर्षसम्म संसद भंग नगरेर जनताको विकास निर्माण र अवस्था परिवर्तनका क्षेत्रमा काम गर्ने प्रतिबद्धता समेत जनाए ।
