अनिवार्य मास्क लगाउन स्वास्थ्य मन्त्रालयको आग्रह

काठमाडाैं। स्वास्थ्य तथा जनसङ्ख्या मन्त्रालयले सार्वजनिकस्थलमा अनिवार्य मास्क लगाउन अनुरोध गरेको छ । मन्त्रालयले एक विज्ञप्ति प्रकाशित गरी छिमेकी देशमा कोरोना भाइरसको नयाँ भेरियन्ट बिएफ–७ को सङ्क्रमण बढ्दै गएको भन्दै मास्क लगाउन आग्रह गरेको हो ।

मन्त्रालयले भौतिक दूरीसमेत कायम गर्न आग्रह गरेको छ ।मन्त्रालयका प्रवक्ता डा. सञ्जयकुमार ठाकुरद्वारा हस्ताक्षरित विज्ञप्तिमा स्यानिटाइजरको प्रयोग गर्न, नियमितरूपमा साबुनपानीले हात धुनेलगायत स्वास्थ्यका सबै मापदण्ड अनिवार्य पालना गर्न आग्रह गरिएको छ ।

यस्तै विज्ञप्तिमार्फत कोभिड–१९ को बुस्टर डोज खोप लगाउन पनि अपिल गरिएको छ ।अङ्ग्रेजी नयाँ वर्ष २०२३, क्रिसमसलगायत कुनै पनि भिडभाड हुने स्थलमा विशेष सतर्कता अपाउनसमेत मन्त्रालयले आग्रह गरेको छ ।

नेपालमा बिएफ–७ भेरियन्ट पुष्टि नभए पनि चीन र भारतमा बढ्दै गएकाले खुला सिमाना र आवतजावतका कारण जोखिम रहेको हुँदा  स्वास्थ्य मापदण्डकाे पालनामा जाेड दिएकाे मन्त्रालयले जनाएकाे छ ।