तानसेन। परम्परागत रैथाने खानाको प्रवर्धन, संरक्षण तथा संस्कृतिको जगेर्ना गर्ने उद्देश्यका साथ ‘प्रथम बर्तुङ्ग खाना महोत्सव तथा सांस्कृतिक कार्यक्रम २०८३’ आयोजना हुने भएको छ। तानसेन नगरपालिका वडा नं. ६, र बर्तुङ्गस्थित ७ वटा टोल विकास संस्थाहरूको संयुक्त आयोजनामा एक दिने सडक खाना महोत्सव हुन लागेको हो।
महोत्सव यही जेठ ९ गते शनिवार हुने आयोजकले पत्रकार सम्मेलन गरेर जानकारी दिएको छ । ‘सडकमै खाऔँ, सडकमै रमाऔँ’ भन्ने मूल नाराका साथ आयोजना हुन लागेको यस महोत्सवले पाल्पाको आन्तरिक तथा बाह्य पर्यटन विकासमा ठुलो टेवा पुर्याउने विश्वास लिइएको छ ।
महोत्सव मूल आयोजक समितिका अध्यक्ष भूमिकला बुढाथोकीका अनुसार बटुकसहित पाल्पाली चुकाउनी, पकौडा, सेलरोटी र योमरी लगायतका परिकारहरूको पहिचान र प्रचार प्रसार गर्दै १५ वटा खानाका स्टल राखिनेछ ।
महोत्सवमा आगन्तुकहरूलाई आकर्षित गर्न बटुक बनाउने प्रत्यक्ष विधि (तरिका) समेत प्रस्तुत गरिने तयारी छ। महोत्सवमा स्वदेशी र विदेशी पर्यटक आर्कषण गर्ने उद्देश्य रहेको वडा अध्यक्ष सागरमान मर्हजनले बताए ।
वडा सदस्य, रेखा विस्ट, गोमा गैरे, वडा सचिव विशाल वली पत्रकार मासंघ पाल्पाका सचिव रामचन्द्र रायमाझी लगायतले रैथाने खानको प्रचारसंगै यसको बारेमा पुस्ता हस्तन्तरण र सिद्धार्थ राजमार्गकै छेउमा हुने महोत्सवले लुम्बिनी, पोखराका पर्यटकलाई सहभागी गराउनु सके उद्देश्य पूरा हुने धारणा व्यक्त गरे । महोत्सव सम्पन्न गर्न करिब २ लाख रुपैयाँ खर्च हुने अनुमान गरिएको छ ।
महोत्सवमा ५ हजारभन्दा बढी दर्शकहरूले अवलोकन गर्ने लक्ष्य राखिएको छ । कार्यक्रममा स्थानीय तथा राष्ट्रिय स्तरका कलाकारहरूको बेजोड साङ्गीतिक प्रस्तुति, सांस्कृतिक झाँकी आयोजना गरिने स्थानीय सुदर्शन कोइरालाले बताए ।
सम्बन्धित खवर
