तानसेन। पाल्पामा हिजो राति बस दुर्घटना हुँदा एकै गाउँका छ जनाको मृत्यु भएको छ । पश्चिम पाल्पाको रैनादेवी छहरा गाउँपालिका वडा नंं ८ खुसार्ने रुपन्देहीमा सालझण्डीबाट यात्रु लिएर आउँदै गरेको ग १ ख ४९७७ नं को बस करिब १० बजे दुर्घटना भएको प्रहरीले जनाएको छ ।
दुर्घटनामा स्थानीय ६ जना महिलाको मृत्यु भएको प्रहरीले जनाएको छ । मृत्यु हुनेमा ११ वर्षीया सरुमाया घिमिरे, ३६ वर्षीया, निर्मला घिमिरे, ५४ वर्षीया खीम कुमारी गाहा, २१ वर्षीया दान कुमारी खत्री, ४० वर्षीया गुना कुमारी गाहा र २१ वर्षीया बीना पाण्डे रहेको घटनस्थलमा रहेका ट्राफिक प्रहरी खेम विक्रम थापाले जानकारी दिए।
मृतक सबै खुर्साने गाउँका हुन् । दुर्घटनामा परेका १८ जना घाइतेलाई रुपन्देहीतर्फ उपचारका लागि पठाइएको प्रहरीले जनाएको छ ।
चालक समेत घाइते छन् । बस सडकबाट करिब ६० मिटर तल भिरमा खसेको छ । भने, दुर्घटनाको कारण खुल्न नसकेको प्रहरीले जनाएको छ ।
मृतकको शवलाई पोष्टमार्टमका लागि पठाउने तयारी भएको प्रहरी चौकी जुठापौवाका बरिष्ठ हवल्दार लिलाबहादुर केसीले जानकारी दिए। घटनास्थल सालझण्डी ढोरपाटन सडक खण्ड अन्तरगत पर्दछ ।
