पाल्पा। लुम्बिनी प्रदेशका सभामुख तुलाराम घर्ती मगरले संविधान र संघीयता कार्यान्वयनमा राज्य संरचनाका तिनै तह गम्भिर र जिम्मेवार बन्नु पर्ने बताएका छ्न । संविधान दिवस – २०८० को अवसरमा बुधवार शुभकामना सन्देश जारी गर्नुहुदै सभामुख घर्ती मगरले संविधान कार्यान्वयनमा देखिएको कमीकमजोरी सच्याएर आगामी दिनमा हुने थप अभ्यासबाट संविधान समृद्ध हुँदै जाने विश्वास व्यक्त गरेका हुन।
सभामुख घर्तिले संविधान कार्यान्वयनको क्रममा भएका कमीकमजोरी सम्वन्धी खबरदारीको रुपमा आएका जनताको सकारात्मक सुझावहरुले संविधान र संघीयतालाई थप परिस्कृत बनाउने बताए।
नेपाली जनताको दशकौं लामो अनवरत संघर्षको परिणामका रुपमा मुलुकले नयां संविधान पाएको र नयां संविधानसहित संघीय लोकतान्त्रीक गणतन्त्रात्मक व्यवस्थाको पनि अभ्यास भइरहेको जनाउनुहुदै सभामुख घर्ती मगरले संविधानको मर्म अनुरुप प्रदेश र स्थानीय तहले आफ्नो जिम्मेवारी पुरा गरिरहेको बताए । उनले लुम्बिनी प्रदेश सभा संविधानको मर्म र भावनालाई आत्मसाथ गर्दै जनचाहना अनुसार ऐन कानुन निर्माण गरिरहेको पनि बताए।
सभामुख घर्तिले संविधानले सम्पूर्ण नेपालीहरुको भावनाको प्रतिनिधित्व गरेको र सामाजिक न्यायसहितको लोकतान्त्रिक मूल्य मान्यता समेटिएकाले यो संविधान अहिलेसम्मकै उत्कृष्ट र जनमैत्री संविधान भएको दावी गरे ।
संघीयता कार्यान्वयनको प्रमुख कडीको रुपमा रहेको यो संविधान नेपाली जनताको भविष्य निर्धारक पनि भएको शुभकामना सन्देशमा उल्लेख गर्दै सभामुख घर्तिले भने-“जनताका प्रतिनिधिहरुले संविधान सभामार्फत् संविधान निर्माण गरी जारी भएको ८ बर्ष पूरा भएको सुखद अवसरमा देश तथा विदेशमा रहनुभएका सम्पूर्ण नेपाली आमा–वुवा दिदी–बहिनी एवम् दाजु–भाईहरुमा हार्दिक शुभकामना व्यक्त गर्दछु । नेपाली जनताको संविधान निर्माण र कार्यान्वयनको ७६ वर्ष (२००४–२०८०)को इतिहासमा यो दिन निकै महत्वपूर्ण दिन हो ।
संविधान जारी गरिएको यो विशेष दिनमा जनयुद्ध, जनआन्दोलन एवम् विभिन्न कालखण्डमा भएका क्रान्ति, आन्दोलन र संघर्षमा जीवन अर्पण गर्नु हुने महान् सहिदहरुप्रति भावपूर्ण श्रद्धाञ्जली अर्पण गर्दछु साथै घाइते, अपाङ्ग एवम् बेपत्ता योद्धाहरुलाई उच्च सम्मान व्यक्त गर्दछु । संविधान निर्माण प्रक्रियामा योगदान गर्नु हुने सम्पूर्णमा हार्दिक धन्यवाद ज्ञापन गर्दछु । ” शुभकामना सन्देशमा उल्लेख गरिएको छ ।
सम्बन्धित खवर
