पाल्पा – योङ कम्युनिष्ट लिग, नेपाल पाल्पाले चीन र भारतबीच भएको लिपुलेक नाका सम्झौताको कडा शब्दमा विरोध गर्दै नेपाल सरकार र प्रधानमन्त्रीको ध्यानाकर्षण गराएको छ। वाईसीएल पाल्पाका अध्यक्ष कमल श्रेष्ठले जिल्ला प्रशासन कार्यालय, पाल्पामार्फत प्रधानमन्त्रीलाई ध्यानाकर्षण पत्र बुझाएका हुन्।
पत्रमा, २०८२ भदौ ३ गते भारत भ्रमणमा रहेका चिनियाँ विदेशमन्त्री वाङ यी र भारतीय विदेशमन्त्री एस जयशङ्करबीच भएको सहमतिपत्रको बुँदा नम्बर ९ मा लिपुलेक नाकालाई द्विपक्षीय व्यापारका लागि खोल्ने निर्णय गरिएको प्रति गम्भीर आपत्ति जनाइएको छ।
“लिपुलेक, लिम्पियाधुरा र कालापानी नेपालको अविच्छिन्न भूभाग हो,” पत्रमा भनिएको छ, “नेपालको सहमतिविना उनीहरूले त्यसलाई आफ्नो व्यापारिक मार्ग बनाउन कुनै सम्झौता गर्नु अन्तर्राष्ट्रिय कानुन र नेपालको सार्वभौमिकताको विरुद्धको कुरा हो।” वाईसीएलले यस कार्यको कडा भर्त्सना गर्दै नेपाल सरकारलाई यस विषयमा प्रभावकारी कूटनीतिक पहल गर्न आग्रह गरेको छ।
साथै, प्रधानमन्त्रीको आसन्न भारत भ्रमणको सन्दर्भमा नेपालको सार्वभौमसत्ता र भू-अखण्डताको सवाललाई दृढतापूर्वक उठाउन पनि माग गरिएको छ। वाईसीएलले सबै राष्ट्रवादी नेपालीहरूलाई नेपालको कुनै पनि भूभाग अनाधिकृत रूपमा कब्जा गर्ने विस्तारवादी षड्यन्त्रविरुद्ध सशक्त आवाज उठाउन आह्वानसमेत गरेको छ।
सम्बन्धित खवर
