तानसेन। बगनासकाली गाउँपालिकामा हिउँदे अधिवेशन सुरु भएको छ । बुधबार गाउँसभाको १९ औं अधिवेशन अन्तर्गत पहिलो बैठक सम्पन्न भएसँगै अधिवेशन सुरु भएको हो ।

गाउँपालिका अध्यक्ष सरस्वती दर्लामी चिदीले अधिवेशन पानसमा दीप प्रज्वलन गर्दैै औपचारिक बैठक प्रारम्भ गरिन। गाउँसभामा गाउँसभा सदस्य टिकाबहादुर थापा, यमलाल तिमिल्सिना, कृष्ण प्रसाद वस्याल र राजेन्द्र वस्यालले समसामयिक विषय उठान गरेका थिए ।

शून्य समयमा सुझाव राख्ने गाउँसभा सदस्यले विषयगत समितिबाट प्रस्तुत भएका प्रतिवेदन कार्यान्वयन प्रभावकारी बनाइनुपर्ने, मेला महोत्सव सञ्चालन गर्दा गाउँपालिकाको हित हुने गरी गर्नुपर्ने, कृषि र पर्यटनमुखी कार्यक्रम बनाई कार्यान्वयनमा जोड दिनुपर्ने, जेष्ठ नागरिक अधिकारमा न्यायिक समितिले ध्यानदिनुपर्ने र तरकारीमा आत्मनिर्भर बनाउनेगरी कृषकलाई कृषि साक्षरता बढाउने र कृृषि उपज संकलनका लागि कार्यविधि बनाएर कृषि एम्बुलेन्स सञ्चालन गर्नुपर्ने सुझाव राखेको सभाका सचिव एवं गाउँपालिकाका प्रमुख प्रशासकीय अधिकृत प्रकाश पाण्डेले जानकारी दिए।

सहभागीका सवालबारे जवाफ दिँदै गाउँसभा सदस्य एवम् गाउँपालिका उपाध्यक्ष हरिप्रसाद पाठकले करको दायरा बढाई आन्तरिक आम्दानीमा वृद्धि गर्न छलफल चलाइने, आवश्यक ऐन, नियम बनाएर कार्यक्रम सञ्चालन गरिने र वातावरणीय प्रभाव मूल्याङ्कन गरी नदीजन्य पदार्थ उत्खनन् गरिने जानकारी दिए। उनले सार्वजनिक सूचनामार्फत मेला महोत्सव सञ्चालन गरिने, जेष्ठ नागरिकको सवालमा आवश्यक कार्यक्रम सञ्चालन गरिने सोंच रहेको बताए।

गाउँसभामा गाउँपालिका उपाध्यक्ष हरिप्रसाद पाठकबाट चालु आर्थिक वर्ष २०८२ को स्वीकृत विनियोजन विधेयक– २०८२ अन्तर्गतका आयोजना, कार्याक्रमको रकमान्तर तथा खर्च कटौती सम्बन्धी प्रस्ताव पेश भएको छ । यस्तैगरी विधेयक समितिका संयोजक उमाकला अर्यालबाट गाउँ प्रहरी व्यवस्थापन विधेयक – २०८२ सम्बन्धी प्रस्ताव पेश भएको छ । जसमा आगामी बैठकमा छलफल हुनेछ । त्यसपछि यी विषय कार्यान्वयनमा अघि बढ्ने बताइएको थियो ।

सभामा विषयगत समितिका संयोजकले चालु आर्थिक वर्षको अर्ध वार्षिक प्रगति प्रतिवेदन पेश गरेका थिए। विधेयक समिति संयोजक उमकला अर्याल, न्यायिक तथा राजस्व परामर्श समिति संयोजक हरिप्रसाद पाठक, लेखासमिति संयोजक कृष्ण प्रसाद वस्याल, आर्थिक विकास समितिको संयोजक खुमादेवी भट्टराई, सामाजिक विकास समिति संयोजक गीता रेग्मी, पूर्वाधार विकास समिति संयोजक तेज प्रसाद रसाली, र सुशासन तथा संस्थागत विकास समितिका संयोजक वसन्ती थापाले प्रतिवेदन प्रस्तुत गरेका थिए ।

गाउँपालिकाको १९ औं अधिवेशनसम्म आउँदा २३ ऐन, नियमावली, ७४ कार्यविधि ५ निर्देशिका स्वीकृत भएको छ । यस्तैगरी गाउँपालिकामा ८ वटा उजुरु दर्ता भएको, सामाजिक विकास समितिलाई प्राथमिकतामा राखेर बजेट तथा कार्यक्रम सञ्चालन गरिनुपर्ने लगायतका सुझाव पेश भएका थिए ।

गाउँपालिका अध्यक्ष सरस्वती दर्लामी चिदीले अर्धवार्षिक कार्यसम्पादन समीक्षा पेश गर्दै सार्वजनिक सेवा प्रवाह र योजनाको काम सन्तोषजनक रहेको, प्राप्त सुझावबारे आवश्यक छलफलसहित आगामी कार्यक्रम अगाडी बढ्ने बताए।